WooCommerce

Përshkrim

WooCommerce është platforma etregti për WordPress, me burim të hapët.

Platforma jonë bazë është e lirë, e zhdërvjellët dhe e amplifikuar nga një bashkësi globale. Liria e burimit të hapët do të thotë se mbani përgjithmonë pronësinë e plotë të lëndës dhe të dhënave të shitores tuaj.

Qoftë kur nisni një biznes, kaloni në internet një shitore tradicionale, apo zhvilloni sajte për klientë, përdoreni WooCommerce-in për një shitore që përzien fuqishëm lëndën dhe tregtinë.

• Krijoni vitrina të hijshme, ndjellëse, shitoresh me tema të përshtatshme për markën tuaj dhe industrinë përkatëse.
• Shtoni të ardhurat me një funksionim të optimizuar shporte blerjesh që të bën për vete.
• Përshtatni faqe produktesh brenda minutash, duke përdorur blloqe modularë produktesh.
• Nxirrni në pah të mira materiale dhe dixhitale, variante produktesh, formësime vetjake, shkarkime të atypëratyshme dhe artikuj nga gjetiu.
• Shitni subscriptions, bookings, ose memberships, me zgjerimet tona që kanë vulën e zhvilluesve.
• Ngrihuni në krye të përfundimeve të kërkimit, duke shfrytëzuar avantazhin e SEO-s së WordPress-it.
• Ndërtoni në një platformë të përshkallëzueshme. Merrni e-tregti të zhdërvjellët, për shitore me shumë punë.

KREJT MJETET QË JU DUHEN PËR TË SHITUR

Mjete të brendshme dhe integrime popullore ju ndihmojnë të administroni me efikasitet punët e biznesit tuaj. Mjaft shërbime janë falas për t’i shtuar me një klikim të vetëm përmes Ndihmësit opsionalë të Ujdisjes.

• Zgjidhni se si doni të paguheni. Administroni me lehtësi pagesat që nga rehatia e shitores tuaj, me WooPayments (E përdorshme në ShBA, Britani të Madhe, Irlandë, Australi, Zelandë të Re, Kanada, Spanjë, Francë, Gjermani dhe Itali). Pranoni në mënyrë të siguruar karta krediti, portofola celularë, dërgesa bankare dhe para të thata, falë 100 e ca kanalesh pagesash – përfshi Stripe, PayPal dhe Square.
• Formësoni mundësitë tuaja të dërgimit. Shtypni etiketa USPS drejt e nga pulti juaj dhe madje planifikoni marrje paketash, me Dërgime WooCommerce (Vlen vetëm në ShBA). Lidhuni me transportues të mirënjohur, të tillë si UPS dhe FedEx – plus një larmi të madhe zgjidhjesh livrimi, inventari dhe plotësimi porosish për gjuhën tuaj.
• Thjeshtoni punën me taksa shitjesh. Shtoni Taksa WooCommerce ose shërbime të integruara të ngjashme për ta bërë realitet përllogaritjen e automatizuar të tyre.

Rritni biznesin tuaj, shtoni veçori dhe mbikëqyrni shitoren tuaj, prej ngado që të jeni

WooCommerce do të thotë biznes. Mbani skeda me matjet më të rëndësishme për ju të funksionimit, me një pult të fuqishëm dhe të zhdërvjellët të ndërtuar brenda WooCommerce-it.

Zgjeroni publikun tuaj përmes kanalesh marketingu dhe rrjetesh shoqërorë, me integrime për Google Ads, HubSpot, Mailchimp dhe Facebook. Mundeni përherë të shihni te pulti i brendshëm i Marketing Hub-it për ide të freskëta dhe ndihmëza që të keni sukses.

Thelloni funksionimin e shitores me qindra zgjerime falas apo me pagesë prej WooCommerce Marketplace-it zyrtar. Zhvilluesit tanë kontrollojnë çdo zgjerim të ri dhe shqyrtojnë rregullisht zgjerimet ekzistuese për të ruajtur standardet e cilësisë të Marketplacet-it. Kërkojmë aktivisht për produkte që ndihmojnë krijuesit e shitoreve të krijojnë shitore të suksesshme.

Administrojeni shitoren tuaj prej ku të jetë, me aplikacionin WooCommerce për celular falas (Android dhe iOS). Kujdes: Mbani vesh tingullin paksa ngjitës “ça-çing” që dëgjohet sa herë që bëni një shitje të re!

Jini zot dhe kontrolloni të dhënat e shitores tuaj – përgjithmonë

Me WooCommerce-in, të dhënat tuaja janë tuajat. Përherë.

Nëse zgjidhni të ndani me ne të dhëna përdorimi, mund të ndiheni i sigurt kur të dini që janë të anonimizuara dhe se mbahen të siguruara. Zgjidhni lënien jashtë kësaj praktike kur të doni, pa ndikim mbi shitoren tuaj.

Ndryshe nga zgjidhje e-tregtie të strehuara nga aksh shërbim, të dhënat e shitoreve WooCommerce janë të paprekshme nga e ardhmja; jeni i lirë të eksportoni krejt lëndën tuaj dhe ta merrni sajtin tuaj te cilado platformë që zgjidhni. S’ka kufizime.

Pse e zgjedhin (dhe e duan) zhvilluesit WooCommerce-in

Zhvilluesit mund ta përdorin WooCommerce-in që të krijojnë, përshtatin dhe shtrijnë më tej një shitore për të plotësuar kërkesat ekzakte të klientit, duke bërë thellime përmes zgjerimesh ose zgjidhjesh vetjake.

• Shfrytëzoni hook-e dhe filtra për të ndryshuar anë funksionimi ose për të krijuar të reja.
• Integroni praktikisht çfarëdo shërbimi, duke përdorur një API REST dhe webhook-e të fuqishëm.
• Skiconi dhe ndërtoni blloqe vetjakë lënde, me React.
• Inspektoni dhe ndryshoni çfarëdo aspekti të kodit bazë të shtojcës.
• Përshpejtoni zhvillimin, me CLI të rrufeshme.

Platforma bazë është provuar në mënyrë rigoroze dhe shpesh, nën kujdesin e një ekipi të përkushtuar të shtrirë në vende të ndryshme. Një dokumentim i plotë përditësohet me çdo hedhje në qarkullim, duke ju fuqizuar të krijoni saktësisht shitoren e kërkuar.

Bëhuni pjesë e bashkësisë sonë ndërkombëtare gjithnjë në rritje

WooCommerce-i ka një bashkësi të gjerë, të pasionuar, përkushtuar ndihmës për tregtarë që këta të kenë sukses – dhe po rritet me shpejtësi.

Ka Takime WooCommerce në pika anembanë botës te të cilat mund të merrni pjesë pa pagesë dhe madje edhe të merreni me zhvillimin e tyre. Këto veprimtari janë një rrugë e goditur për të mësuar prej të tjerëve, për të dhënë përvojën tuaj dhe për t’u lidhur me njerëz që e mendojnë njësoj si ju këtë punë.

WooCommerce-i është gjithashtu rregullisht i pranishëm në WordCamp-e anembanë rruzullit – dhe duam fort të njihemi me ju.

Jepni ndihmesë dhe përktheni

WooCommerce zhvillohet dhe mbulohet nga Automattic, krijuesit e WordPress.com-it dhe Jetpack-ut. Kemi gjithashtu qindra kontribues të pavarur dhe gjithmonë ka vend për më tepër. Shkoni te Depoja e WooCommerce-it në GitHub, që të mësoni se si mund të përfshiheni.

WooCommerce-i është i përkthyer në shumë gjuhë, përfshi danishten, ukrainishten dhe persishten. Ndihmoni të përkthehet edhe më tej WooCommerce-i, duke shtuar gjuhën tuaj – vizitoni translate.wordpress.org.

Lidhje me WooCommerce.com

Mund ta lidhni shitoren tuaj me WooCommerce.com, që të administroni pajtimet tuaja që nga WooCommerce Marketplace dhe të merrni përditësime produktesh pa dalë nga pjesa e përgjegjësit të WordPress-it. Lidhja bën gjithashtu të mundur instalimin e produkteve të blera fill e nga WooCommerce.com dhe thjeshton përdorimin e asistencës teknike. Nëse do të donit të mësonit se çfarë të dhënash mblidhen dhe si përdoren, ju lutemi, shihni Rregullat tona të Privatësisë.